Бөлүмдөр
Шейшемби, 23-октябрь
Чүй облусуАламүдүн району 18.01.2018 16:19

Эл ичи — өнөр кенчи: Опера ырчысы К.Карыпбаева англичанды ыйлатып, япониялык кишини өзүнө жүгүнткөн (фото)

Turmush -  Кундуз Карыпбаева 16 жылдан бери опера театрында эмгектенип келет. Ал чыгармачылыктын арты менен Америка, Россия, Казакстан, Түркия, Кипр, Франция, Болгария жана башка мамлекеттерди кыдырып келди. Аны менен аймактык кабарчы таанышты.

Кундуз Карыпбаева вокал боюнча эл аралык сынактын лауреаты, Астана шаарынын маданият департаментинин атайын сыйлыгынын ээси болгон.

«Аламүдүн районундагы Арашан айылында чоңойдум. Стрельникова орто мектебин аяктап, опера студиясында эки жыл окугандан кийин, Кыргыз улуттук консерваториясына тапшырдым. Аны 2005-жылы ийгиликтүү аяктап алдым. Эмгек жолум студенттик кезде эле башталган. Тактап айтканда, консерваторияда 2-курста окуп жүргөндө Кыргыз улуттук академиялык Абдылас Малдыбаев атындагы опера жана балет театрында солист болуп эмгектене баштагам. 16 жылдан бери ушул опера театрындамын. Ошол жылдар ичинде кыргыз операларынан баштап дүйнөлүк операларга чейин аткардым. В.Власов, А.Малдыбаев, В.Фере жазган "Айчүрөк" операсынан, Калыйман жана Н.Давлесовдун "Аста секин, колуктуда" Зияданын, У.Гаджибековдун "Аршин мал алан" чыгармасында Асиянын, Перголезинин "Служанка — госпожа" операсында Серпинанын, Ж.Бизенин "Карменинде", Франц Легардын "Фраскита", В.А.Моцарттын "Волшебной флейте" чыгармасындагы Паминанын, Моцарттын "Дон Жуан" операсында Церлинанын ролун жараттым. Балдар үчүн жазылган Калмановскийдин "Белоснежка" операсында башкы каармандын, Вердининдин "Риголетто" операсында Жильданын, Вердининдин "Травиата" операсында Виолеттанын жана башкалардын чыгармаларындагы партияларын аткардым.

Ал эми 2008-жылы улут үчүн маанилүү болгон чоң иш-чарага катыштык. Кыргыз профессионал музыкасында романс жок дешчү. "Кыргыздар романс дегенди билбейт" деген намыска тийчү сөздөрдү жокко чыгарыш үчүн, чыгармачылык топ өзүнчө чогулуп алып, композиторубуз Сатылган Осмонов Асан Жакшылыковдун "Махабатка кезигүү" деген романстар жыйнагына обон жазды. Ошентип кыргыз романстар түрмөгү жарык көрдү», - деди ал.

Учурда анын репертуарында үнүнө ылайыкталып, атайын буйрутма менен жазылган 3 жеке, 3 дуэт романстары бар. Алар: «Жашоо вальсы», «Жаз ыргагы», «Тамчы», «Түн уйкуда», «Таанышуу», «Ай перим».

«Опера театрында эки чоң концерт өткөрүлгөн соң чыгармачыл топ менен университеттерди кыдырып, «Махабатка кезигүү» аттуу концерттерди тартуулап жүрдүк. Эң кубанычтуусу бул романстар түрмөгү биздин алтын казынага жазылып, сакталып калган.

Вокал боюнча эл аралык сынактардын лауреаты жана дипломанты, Астана шаарынын маданият департаментинин атайын сыйлыгынын ээсимин, ошондой эле Шымкенттеги романсиада жарышында лауреат болуп кайтсам, «Шабыт» эл аралык сынакта 2-орунду алгам. Чыгармачылыктын арты менен Америка, Россия, Казакстан, Түркия, Кипр, Франция, Болгария жана башка мамлекеттерди кыдырып келдим.

Жумушта кызыктуу окуялар көп болот. Бир жолу Санкт-Петербургда концерт берип, андан кийин ресторанга майрамга бардык. Комузумду ала баргам. Кезек менен жакшы тилектер айтылып, ырлар ырдалып жатты. Мен элдер суранса бир сааттай ырдаптырмын. Экинчи залдан бир англичан келип, баарыбыздан кечирим сурап, андан соң мага кайрылып "сиз эмне жөнүндө ырдап жатканыңызды билбейм, бирок мен аябай ыйлагым келип турат, уруксат берсеңиз босогодо туруп, угуп турайынчы" деди. Андан кийин эс алууга чыкканда япониялык улгайган киши мени токтотуп алып, көпкө чейин мага жүгүнүп турду. Ал жүгүнсө, мен да жүгүндүм, ал кайра мага жүгүнөт, мен да кайра жүгүнүп коем. Экөөбүз бир тилде сүйлөшпөсөк да жүгүнүшүп, түшүнүшүп койдук», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×